„Ловец на спомени“ е егзистенцијална сага, драматична игра проткаена
со копнеж. Виртуозна приказна, филигрански доловена со препознатливиот,
лиричен сензибилитет на книжевното перо на Серафимовска. Роман што покрај
носталгијата, кај читателот буди јасна надеж и предизвикува наслада за сите сетила.
Сегашност, Чикаго. Младиот академски сликар Бенџамин Блумфилд
запаѓа во тешка финансиска ситуација и навидум безизлезна, психолошка криза.
Смртта на неговата мајка Естер Хантер само го продлабочува емотивниот
колапс.
Тој очајно ,,чекори по танко јаже“ додека истовремено жонглира со разнишаната
долгогодишна врска со неговата свршеница Леонора Ларсен – модел за долна
облека од нордиско потекло, но и со својот отуѓен татко Џејкоб Блумфилд, богат
и успешен кривичен адвокат со кого имаат комплициран однос.
Љубовта кон мајката е окосница на оваа топла и трогателна приказна.
Споменот на неа е како светилник, но и тој, полека му избледнува од
потсвеста. Соочен со своите внатрешни демони и прогонуван од соништата,
Блум се бори со сите сили да исплива од тој длабок океан на тагата.
Само љубовта е она што, сепак, го одржува на површината…
